Vum 16. bis den 20. Juni 2025 stoung op der 'LUGA 2025 – Luxembourg Urban Garden' alles am Zeeche vun der Educatioun. An dësem Kader huet de SCRIPT zwou innovativ a praktesch Léierressourcen entwéckelt, déi d’Kanner motivéieren, d’Welt ronderëm sech aktiv ze entdecken.

De 'FuDo-Wee' ass eng lieweg Exploratiounsrees, déi vu Klassen als Grupp ka gemaach ginn. Op verschiddene Statiounen dobausse kënnen d’Schüler an d’Schülerinnen op spilleresch Aart a Weis fuerschen, entdecken a léieren. Dëse Wee verknëppt Erfarung mat Wëssensvermëttlung an ënnerstëtzt eng naturbezunnen a kompetenzorientéiert Schoul.

Déi zweet Ressource, 'Eis gebaute Welt', bitt am Kader vun enger speziell entwéckelter 'LUGA-Missioun' d’Méiglechkeet, sech mat dem Verhältnis tëschent Architektur an Natur auserneenzesetzen. D’Aarbechtsmaterial 'Stadtnatur/Naturstadt' enthält ronn 40 Mini-Aktivitéiten, déi fir all Cycle ugepasst sinn an an de Klassenalldag integréiert kënne ginn. D’Material kann ee gratis am Science Hub op der 'LUGA' kréien a steet nach bis Oktober do zur Verfügung.

Doriwwer eraus kann et och via de Bon de Commande 2025-2026 bestallt ginn. All d’Materialien si souwuel op Däitsch wéi och op Franséisch disponibel. Am Laf vun der Educatiounswoch goufen och speziell Formatiounen zu 'FuDo' an 'Eis gebaute Welt' fir interesséiert Léierpersounen ugebueden. Dës Ateliere sollten d’Léierpersonal inspiréieren an hinne konkret Iddien an d’Hand ginn, wéi si déi pedagogesch Offeren an hirem Unterrecht kënne notzen.

Dir kënnt d’Aktivitéite vum SCRIPT op der 'LUGA' nach bis Oktober entdecken a mat äre Klassen erliewen. Et ass eng wonnerbar Geleeënheet, Léieren an Entdecken an engem inspiréierende Kader ze verbannen.