De SCRIPT-Projet 'makedra (Maach (k)een Drama)' huet an dësem Schouljoer 2022-2023 dräi weider IFEN-Formatiounen am theaterpedagogesche Beräich ugebueden.

'makedra.lu a menger Klass' wëll sou d’Léierpersonal fir d’Enseignéiere mat Hëllef vun Theaterpedagogik encouragéieren, fërderen a motivéieren a proposéiert heifir ganz praktesch Outilen, Übungen a Spiller fir an der Klass.

Duerch eng flott a wäertvoll Zesummenaarbecht mat de Kulturhaiser, war et 'makedra' dëst Joer méiglech, seng Formatiounen am Süden, am Zentrum an am Norden ubidden ze kënnen an iwwert dee Wee nach méi Léierpersonal erreechen ze kënnen.

D’Büne vum Aalt Stadhaus (Déifferdeng), vum Cube 521 (Maarnech) a vum Mierscher Kulturhaus (Miersch) hunn et de Participanten erlaabt, ee flotten an authenteschen  Theatermëtten ze verbréngen a verschidde Facettë vun dëser Offer vum SCRIPT aktiv ze erliewen a kennenzeléieren.

Eng ronn 50 Participanten hunn un der Formatioun deelgeholl, sech ausgetosch a nei Iddie kritt fir d’theaterpedagogesch Materialien am Schoulalldag unzewenden a sou de Schüler a Schülerinnen  hier Kompetenzen ze stäerken.

An dësem Video fannt dir e puer Impressioune vun de Formatiounen.